dieses Mal mit: Gian-Andri Frei
Was hätt dä mit em FCH z‘tue?»
- Langjähriger und äusserst erfolgreicher Juniorentrainer (u.A. Cup-Sieger mit den Ba-Junioren und Aufstiege in die Youth League)
- Ab neuer Saison 3. Liga Trainer der 2. Mannschaft
- Lieblingsclub in der Schweiz: Zürcher SC
- Lieblingsclub im Ausland: Tottenham Hotspurs
Uwe, an wen möchtest du den Ball weiterkicken für das August-Interview? Und warum?
Hier schliesst sich der Kreis von meiner FCH Geschichte. Ein solider Jasser, mein ehemaliger Junior, aktiver Spieler , gewissenhafter Juniorentrainer und bald Aktiv-Trainer soll mein Zuspiel bekommen: Gian Andri Frei. Lange Zeit haben wir nebeneinander trainiert und ich habe ihm unzählige seiner Bälle in die andere Hälfte zurückgespielt. Keiner davon erwähnenswert, aber zweckmässig. Ich wünsche Gianni in seiner neuen Aufgabe als Trainer von unserem 2 alles erdenklich Gute und bin mir sicher, dass er seinen Weg geht und uns viele freudige Momente auf dem Langacker schenken wird.
Deine Reaktion auf das Zuspiel von Uwe?
Es hett mich natürlich unheimlich gfreut und extrem geehrt wo eine vo de ältiste und erfahrenste Trainerfüchs vom FCH, genau mich usgwählt hett. Wahrschinlich nöd zletzt au dur eusi gmeinsame Jahr im Verhältnis Juniortrainer, bin ich scho früeh prägt worde uf de Trainerzug ufzspringe.
Dank dir, sind eusi unzählige Bäll wo ih dis Feld übere gfloge sind au wieder bi eus im Ballsack glandet und dur das hett am Schluss vom Jahr Angelika meh Freud gha bi de Jahresbilanz für Bäll. Ich glaube sust wär de eint oder ander irgendwo imene andere Ballchaste glandet.
Bemerkenswert und unermüdlich Dein Einsatz für die FCH Jugend. Welche Teams hattest Du diesen Frühling, wieviele Abende warst Du in Trainings engagiert?
I demm Früehlig hann ich zum erste Mal Ehr gha ih minere Trainerlaufbahn D-Juniore ztrainiere. De 9er Fuessball isch kompletts Neuland gsi für mich, aber es macht mer grosse Spass wenni zämme mitem Rubens Leopold, die junge Talent zu einere Einheit forme und für euse Verein begeistere däff. D’Hoffnig isch natüürli gross, dass irgendwenn mal de eint oder ander de Schritt ih euses Fanionteam schafft. Es sehr spannends Fuessballalter. Und natüürli macheds d’Jungs hervorragend und es isch jetzt scho eh super Truppe, das macht eim natürlich Trainer-sii au vill eifacher.
Nebed demm hanni däffe, mitem Oli Wyss und Abdi Al Abbadie es Team trainiere. Mir hennd s’Vergnüege mit de A-Juniore gha, die wo das Jahr zum erste Mal ih de Vereinsgschicht als A-Juniore ih de Youth Leauge vertrete gsi sind. Das isch eus denn uh dere Liga im Herbst besser glunge als im Früehlig aber au das, isch es sehr spannends Abntüür gsi, vorallem au will ich gwüssi Manne us demm Team scho 4 oder 5 Jahr trainiert ha.
Die zwei Engagements hennd denn ergeh, dass ich 3 Mal am Abig ufem Platz gstande bin, wemmer Doppelschichte cha mache als Trainer denn sinds gar nöd so vill Äbig.
Und nun übernimmst Du erstmals ein Aktiv-Team, nämlich die 2. Mannschaft. Ich nehme an die Freude ist höher als der Respekt vor dem neuen Amt?
Ja zerst mal isches eh rissegrossi Ehr gsi, dasmer am Batu und mir Vertraue schenkt ich eusne junge Jahr scho däffe es Aktiv-Team trainiere. Lustigerwiis hann ich mir im Früehlig gseit, dass ich vorerst mal Pause mach im 11er Fuessball, aber wo das Ahgebot ufem Tisch gsi isch, hanni natürli nöd chönne nei säge.
Natüürli hanni grosse Respekt vor demm Amt gha, au us demm Grund will ich knapp elter bin als de Altersdurchschnitt im 2 (um die 21 Jahr isch de Durchschnitt), und plötzlich bisch du de Trainer vo über 30-Jährige isch scho öppis ganz anders.
Aber D’Vorfreud isch natüürli vill grösser, mussi ehrlich Zuegeh, ich chas chum abwarte wenns im August denn endlich richtig mit de Vorbereitig losgaht und mir regelmässig mit em komplett neu zämmegwürflete Team ufem Platz stönnd.
Du bist direkt vom FCH2 Spieler zum FCH2 Trainer gewechselt – Option Spielertrainer vorhanden?
Nei das isch grundsätzlich keis Thema für mich, ich bin de Meinig entweder isch mer das oder das. Will mer cha sich bi Spielertrainer weder uf seine no uf s’andere fokussiere und tümplet so irgendwo chli zwüsched drinn ume. Vorallem no wemmer nur szweite ah de Siitleinie staht und no Haupttrainer isch. Dezue und s’Team hett verdient, dass sie mini volli Ufmerksamkeit als Trainer bechömmed.
Ich wird aber min Spielerpass mal no aktiv halte und mini Nummere im 2 nonig freigeh, bekanntlich isch ja s’Kader das Jahr nöd so gross und sött würkli mal grosse Notfall sii und mir effektiv zwenig Lüüt hennd am Spiel, wür ich Fuessballschueh scho nomal schnüere und id Hose. Aber da redemer nöd vo de Normalität, sondern würkli eifach als Absicherig.
Mission 2. Mannschaft ist erfüllt für Dich, wenn nächsten Juni welche Ziele erreicht sind?
Ja ich hett gern eusi Mission vo letztem Jahr wiitergfüehrt, und zwar de Derby-Grand-Slam, jedes Derby wommer hennd mindestens eimal günne. Da isch natüürli no Hoffnig gsi, dass Küsnacht auno ih eusi Gruppe chunnt, leider hennd sie sich wieder für die ander Gruppe entschiede. Wer weiss vilicht hennds immerno Albträum vorem 2, wägem Früehlig 2022 wommer sie hett chönne schlah. Janu, mir hennd ja jetzt es Testspiel gege sie, denn chömmer das denn vilicht nahholle.
Grundsätzlich isch euses grosse Ziel, dasmer im 2 wieder ei Einheit werdet, das die sogenannti FCH 2 Family wo jahrelang berühmtberüchtigt gsi isch, wieder chli uflebt und das wo das Team eigentlich usmacht, dass jede für jede gaht, wieder zur Norm wird.
Sportlich gseh wärs natürlich lässig wemmer chönnted chli meh Pünkt ufem Konto ha nach de Hirundi als letzt Jahr, denn chömmer die ganz Rückrundi chli entspannter ahgah und würed nöd jedes Spiel unter Druck stah. Das wär mal mis erste und grösste sportliche Ziel.
Es stehen wieder tolle Derbys an. Stäfa 1, Männedorf 1, Meilen 1, Zollikon 1. Ich gehe davon aus, das lässt Dein gelb-schwarzes Trainerherz höher schlagen?
Unglaublich, das isch mis erste Mal als Trainer wo ich däff so vill Derbys bestriite und das isch eifach nur wahnsinn. Für so Spiel spillt mer doch genau Fuessball, wenn Emotione ue stiiged, Nervosität ih de Garderobe griifbar isch. Ich ha ja vorher scho vom Derby-Grand-Slam gredet und es git doch nüüt geilers als wemmer als 2. Mannschaft cha die «grosse» mit de hohe Ambitione ärgere, wie Stäfa 1 und Männedorf 1.
Und denn natüürli das Spiel uf das sich jede glaub bereits jetzt schowieder freut, das Derby der Derbys. Das isch als Spiller letzt Jahr scho eis vo mine Highlights gsi, dehei däffe gege de Nachbar usem Oste zspille, au wenns nur für 5 Minute glangt hett und ich debii fast no de Dangel ufem Bode verletzt ha . Und jetzt das ganze no ah de Siitlinie erlebe z’däffe, hoffetntli vor no enere grössere Kulisse als im Früehlig, das wird ganz gross!
An wen möchtest du den Ball weiterkicken für das September-Interview? Und warum?
Min holprige Rückpass bechunnt dasmal en Goalie und zwar min chliine Brüeder de Maurin, er hetts sichs verdient, de Armi hett müsse unter mir als Brüeder trainiere und das 3 Jahr lang. Und ich bi eher uf de fordernde Siite gsi und hann ihn nöd gschont. Au hetter min Respekt, will er erst vor guet 5 Jahr d’Umschuelig is Goal gmacht hett und das nur wills kein andere Goalie annodazumals im C gha hennd und für das macht ers doch sehr sehr guet. Sitt det chammer ihm eigentlich immer schriebe und er staht immer zur Verfüegig wenn irgendwo imene Team Not am Goalie isch, er staht immer da.
So mal luege wie du min Rückpass chasch verwerte, sie sind berühmt berüchtigt, dass nöd würkli guet sind, die wo jahrelang mit mir tschuuted hennd wüssed, dass mal de eint oder ander ufem Weg zum Goalie verhungeret isch und so zum Gegegoal gfüehrt hett.